ലോക്ക്ഡൗണ്‍ : പ്രവാസികള്‍ക്ക് സർക്കാർ പ്രഖ്യാപിച്ച 50 കോടി രൂപ വിതരണം ചെയ്തു

തിരുവനന്തപുരം: 

ലോക്ക്ഡൗൺ കാരണം വിദേശത്തേക്ക് മടങ്ങിപ്പോകാൻ കഴിയാത്ത പ്രവാസികൾക്ക് സർക്കാർ പ്രഖ്യാപിച്ച ധനസഹായം വിതരണം ചെയ്തു. 5000 രൂപ വീതംഒരു ലക്ഷം പേർക്കായി 50 കോടി രൂപയാണ് വിതരണം ചെയ്തത്. ജനുവരി ഒന്നിനു ശേഷം ലീവിന് നാട്ടിലെത്തുകയും ലോക്ക്ഡൗൺ പ്രഖ്യാപിച്ച തീയതിക്കകം തിരികെ പോകാൻ കഴിയാതെ വരികയും ചെയ്തവർക്കാണ് സഹായം പ്രഖ്യാപിച്ചിരുന്നത്. മതിയായ രേഖകൾ സമർപ്പിക്കാത്ത അപേക്ഷകർക്ക് വീണ്ടും അപേക്ഷിക്കാൻ www.norkaroots.org എന്ന വെബ്സൈറ്റിൽ കയറി covid support എന്ന ലിങ്കിൽ ക്ലിക്ക് ചെയ്തു തിരുത്തലുകൾ വരുത്തുക എന്ന ഒപ്ഷനിൽ പോയി അനുബന്ധ രേഖകൾ ഒക്ടോബർ 23-നകം സമർപ്പിക്കാം. എൻ.ആർ.ഐ അക്കൗണ്ട് സമർപ്പിച്ചവർക്ക് തുക കൈമാറിയിട്ടില്ല. ഇത്തരം അപേക്ഷകരെ നോർക്കാ- റൂട്ട്സിൽനിന്നും ബന്ധപ്പെടുന്ന മുറയ്ക്ക് സേവിങ്സ് ബാങ്ക് അക്കൗണ്ട് നമ്പർ നൽകണം. മതിയായ രേഖകൾ സമർപ്പിക്കുന്ന മുറയ്ക്ക് ബാക്കിയുളളവർക്ക് സഹായധനം അനുവദിക്കുമെന്ന് നോർക്ക റൂട്ട്സ് സി.ഇ.ഒ അറിയിച്ചു. ധനസഹായം ലഭിച്ചിട്ടുള്ളവരുടെ ജില്ല തിരിച്ചുള്ള കണക്ക്: തിരുവനന്തപുരം-8452, കൊല്ലം-8884, പത്തനംതിട്ട- 2213, കോട്ടയം- 2460, പാലക്കാട്- 6647, തൃശൂർ-10830, ഇടുക്കി- 523, കോഴിക്കോട്- 14211, വയനാട്- 1281, മലപ്പുറം- 18512, ആലപ്പുഴ-5493, എറണാകുളം-2867, കണ്ണൂർ-11006, കാസർകോട്-6621.