ബെംഗളൂരു: രണ്ട് ദിവസത്തിനിടെ നഗരത്തിൽനിന്ന് കാണാതായത് ഒരു കോളേജ് വിദ്യാർഥിനി ഉൾപ്പെടെ ഏഴ് വിദ്യാർഥികളെ. ബെംഗളൂരു ഹെസാറഘട്ട റോഡ്, എ.ജി.ബി. ലേഔട്ട് എന്നിവിടങ്ങളിൽനിന്നാണ് വിദ്യാർഥികളെ കാണാതായത്. രണ്ട് വ്യത്യസ്ത സംഭവങ്ങളിലും പോലീസ് കേസെടുത്ത് അന്വേഷണം ആരംഭിച്ചു.
ഹെസാറഘട്ട റോഡിലെ സൗന്ദര്യ ലേഔട്ട് നിവാസികളും പത്താം ക്ലാസ് വിദ്യാർഥികളുമായ പരിക്ഷിത്, നന്ദൻ, കിരൺ എന്നിവരെ ശനിയാഴ്ച രാവിലെ മുതലാണ് കാണാതായത്. അന്നേദിവസം വൈകിട്ട് വരെ മാതാപിതാക്കൾ ഇവരെ തിരഞ്ഞെങ്കിലും കണ്ടെത്താനായില്ല. തുടർന്ന് പോലീസിൽ പരാതി നൽകുകയായിരുന്നു.
പോലീസ് നടത്തിയ അന്വേഷണത്തിൽ മൂന്ന് കുട്ടികളുടെയും വീട്ടിൽനിന്ന് കത്തുകൾ കണ്ടെടുത്തു. പഠിക്കാൻ താത്പര്യമില്ലെന്നും നല്ലപേരും പണവും സമ്പാദിച്ചശേഷം തിരിച്ചെത്തുമെന്നുമാണ് മൂവരും കത്തുകളിൽ എഴുതിയിരുന്നത്. പഠനത്തെക്കാൾ തങ്ങൾക്ക് താത്പര്യം കായികമേഖലയിലാണ്. കബഡിയാണ് ഏറെ ഇഷ്ടം. കബഡിയിൽ നല്ലൊരു പേരുണ്ടാക്കുമെന്നും അതിനുശേഷമേ തിരികെവരികയുള്ളൂവെന്നും കത്തിൽ എഴുതിയിരുന്നു. തങ്ങളെ തിരയേണ്ടതില്ലെന്നും കത്തിൽ പറഞ്ഞിട്ടുണ്ട്.
സംഭവത്തിൽ അയൽക്കാരുടെയും പ്രദേശവാസികളുടെയും മൊഴികൾ കേന്ദ്രീകരിച്ചാണ് പോലീസ് അന്വേഷണം നടത്തുന്നത്. സമീപപ്രദേശങ്ങളിലെ സിസിടിവി ക്യാമറകളും പോലീസ് പരിശോധിച്ചിരുന്നു.
ഞായറാഴ്ചയാണ് എ.ജി.ബി. റോഡിലെ ക്രിസ്റ്റൽ അപ്പാർട്ട്മെന്റിൽ താമസിക്കുന്ന നാല് പേരെ കാണാതായത്. ബി.സി.എ. വിദ്യാർഥിനിയായ അമൃതവർഷിണി (21) 12 വയസ്സുകാരായ റോയൻ സിദ്ധാർഥ്, ചിന്തൻ, ഭൂമി എന്നിവരെയാണ് ഞായറാഴ്ച രാവിലെ മുതൽ കാണാതായത്. രാവിലെ അവരുവരുടെ ഫ്ളാറ്റുകളിൽനിന്ന് പുറത്തേക്ക് പോയ ഇവർ പിന്നീട് തിരിച്ചെത്തിയില്ലെന്നാണ് മാതാപിതാക്കൾ പറയുന്നത്. തുടർന്ന് സോളദേവനഹള്ളി പോലീസ് സ്റ്റേഷനിൽ പരാതി നൽകുകയായിരുന്നു.
കാണാതായ മൂന്ന് കൂട്ടികളും അമൃതവർഷിണിക്കൊപ്പമാണ് അപ്പാർട്ട്മെന്റിൽ കൂടുതൽസമയം ചെലവഴിച്ചിരുന്നതെന്ന് മാതാപിതാക്കൾ മൊഴി നൽകിയിട്ടുണ്ട്. അമൃതവർഷിണി കുട്ടികളുമായി എങ്ങോട്ടോ പോയിരിക്കാമെന്നാണ് ഇവരുടെ സംശയം. ഇതിനിടെ കുട്ടികളിലൊരാളുടെ ഫ്ളാറ്റിൽനിന്ന് ഒരു കുറിപ്പും കണ്ടെടുത്തു. ചെരിപ്പുകളും ടൂത്ത് ബ്രഷും വെള്ളക്കുപ്പിയും പണവും എടുക്കണമെന്നാണ് ഈ കുറിപ്പിൽ എഴുതിയിരുന്നത്. ഇതുസംബന്ധിച്ച് പോലീസ് വിശദമായി അന്വേഷിച്ചുവരികയാണ്.
Post a Comment