മാതൃകമ്പനിയുടെ പേര് മാറ്റി ഫേസ്ബുക്ക്. മെറ്റ എന്ന പേരിലായിരിക്കും കമ്പനി ഇനി അറിയപ്പെടുകയെന്ന് സിഇഒ മാര്‍ക്ക് സുക്കര്‍ബര്‍ഗ് അറിയിച്ചു. ഫേയ്‌സ് ബുക്ക് കണക്ട് ഓഗ്മെന്റഡ് ആന്‍ഡ് വെര്‍ച്വല്‍ റിയാലിറ്റി കോണ്‍ഫറന്‍സിലാണ് പ്രഖ്യാപനം.
എന്നാല്‍ ഫേസ്ബുക്ക് , വാട്‌സ്ആപ്പ്, ഇന്‍സ്റ്റഗ്രാം എന്നിവയുടെ പേരില്‍ മാറ്റം വരില്ലെന്നും മാതൃകമ്പനിയുടെ പേരില്‍ മാത്രമായിരിക്കും മാറ്റമെന്നും സുക്കര്‍ബര്‍ഗ് അറിയിച്ചു. കാലിഫോര്‍ണിയയിലെ മെന്‍ലോ പാര്‍ക്കിലെ ആസ്ഥാനത്ത് കമ്പനി പുതിയ ലോഗോയും അനാച്ഛാദനം ചെയ്തു.ഒരു സാമൂഹിക മാധ്യമ കമ്പനിയായി മാത്രം ഒതുങ്ങാതെ അതിന്റെ പ്രവര്‍ത്തനം വ്യാപിപ്പിക്കുന്നതിന്റെ ഭാഗമായിട്ട് കൂടിയാണ് പേര് മാറ്റല്‍.
സോഷ്യല്‍ മീഡിയ പ്ലാറ്റ്‌ഫോം എന്ന ലേബലില്‍ നിന്ന് മാറി ഫോണ്‍ നിര്‍മാണത്തിലേക്കുള്‍പ്പെടെ കമ്പനി കടക്കുന്നതിന്റെ ഭാഗമായാണ് തീരുമാനം. ജനങ്ങളുടെ കൂടുതല്‍ പ്രവൃത്തികളും വെര്‍ച്വല്‍ ലോകത്താക്കുന്ന മെറ്റാവേഴ്‌സ് എന്ന മാറ്റത്തിലേക്കാണ് ഫേസ്ബുക്കും ഒരുങ്ങുന്നത്. സ്വകാര്യതാ ചോര്‍ച്ച സംബന്ധിച്ച് ഫേസ്ബുക്കിനെതിരെയുള്ള വിവാദങ്ങളെ അകറ്റാനും പേരുമാറ്റം സഹായിച്ചേക്കും. ഫേസ്ബുക്കിലെ സുരക്ഷാ വീഴ്ച സംബന്ധിച്ച് മുൻ ജീവനക്കാരി നടത്തിയ വെളിപ്പെടുത്തൽ കമ്പനിയെ ബാധിച്ചിട്ടുണ്ട്.
ഫ്രാൻസിസ് ഹേഗെൻ എന്ന മുൻ ഫേസ്ബുക്ക് പ്രൊഡക്ട് മാനേജരാണ് ആരോപണങ്ങൾ ഉന്നയിച്ചത്. സാധാരണക്കാരുടെ സ്വകാര്യതയെ ഫേസ്ബുക്ക് മാനിക്കുന്നില്ലെന്നും തെറ്റായ വിവരങ്ങൾ പ്രചരിപ്പിക്കുന്നതെ തടയാനുള്ള മാർഗ നിർദ്ദേശങ്ങൾ കൃത്യമായി പാലിക്കുന്നില്ലെന്നും ഇവർ അടുത്തിടെ ആരോപിച്ചിരുന്നു. ഇതിനിടെ ഒക്ടോബർ ആദ്യ വാരം ഏഴ് മണിക്കൂര്‍ നേരം ഫേസ്ബുക്ക്, വാട്‌സ്ആപ്പ്, മെസഞ്ചര്‍, ഇന്‍സ്റ്റാഗ്രാം എന്നീ ആപ്പുകളുടെ പ്രവർത്തനം നിലച്ചതും കമ്പനിക്ക് തിരിച്ചടിയായി.
Post a Comment