കോവിഡ് മഹാമാരിക്ക് കാരണമായ നോവൽ കൊറോണ വൈറസിൽ പുതിയതരത്തിലുള്ള ജനിതക മാറ്റം സംഭവിക്കുന്നതായി പുതിയ പഠനം. ഇതോടെ വൈറസ് കൂടുതൽ വ്യാപകമായി പടർന്നുപിടിക്കാൻ ശേഷിയുള്ളതായിത്തീരുന്നെന്നും പഠനം പറയുന്നു. അയ്യായിരത്തിലധികം ജനിതകമാതൃകകൾ ഉപയോഗിച്ച് നടത്തിയ പഠനമാണ് പുതിയ കണ്ടെത്തലിൽ എത്തിച്ചേർന്നത്. അമേരിക്കയിലെ ഹൂസ്റ്റണിൽ നടന്ന പഠനത്തിലാണ് പുതിയ കണ്ടെത്തൽ. ജനിതകമാറ്റം സംഭവിച്ച വൈറസ് കൂടുതൽ മാരകമാകുന്നതായി പഠനത്തിൽ പറയുന്നില്ലെന്നും വാഷിങ്ടൺ പോസ്റ്റിന്റെ റിപ്പോർട്ട് വ്യക്തമാക്കുന്നു. മാത്രമല്ല, വൈറസിന്റെ വൈദ്യശാസ്ത്രപരമായ സവിശേഷതകളും പഠനത്തിൽ വ്യക്തമായിട്ടില്ല.
എന്നാൽ വ്യാപനത്തിനുള്ള ശേഷി വർധിക്കുന്നതായാണ് കണ്ടെത്തിയിരിക്കുന്നത്. നിലവിൽ ജനങ്ങളിൽ വലിയതോതിൽ പടർന്നിരിക്കുന്ന വൈറസ് കൂടുതൽ വ്യാപന ശേഷിയുള്ളതാണെന്നാണ് പഠനം വ്യക്തമാക്കുന്നത്. വൈറസിന്റെ ഈ സവിശേഷത രോഗത്തെ തടയാനുള്ള ശ്രമങ്ങൾക്ക് വലിയ തിരിച്ചടിയുണ്ടാക്കും.
എന്നാൽ വാക്സിൻ വികസിപ്പിക്കാനുള്ള ഗവേഷണത്തിൽ വൈറസിനെ സംബന്ധിച്ച ഇത്തരമൊരു പഠനം വലിയ ഗുണം ചെയ്യുമെന്നാണ് ഗവേഷകരുടെ കണക്കുകൂട്ടൽ. പ്രാഥമികമായ പഠനം മാത്രമാണ് നടന്നിരിക്കുന്നതെന്നും കൂടുതൽ വിലയിരുത്തലുകൾക്കും പരീക്ഷണങ്ങൾക്കും ഈ കണ്ടെത്തൽ വിധേയമാകേണ്ടതുണ്ടെന്നും പഠനത്തെ വിലയിരുത്തിയ നാഷണൽ ഇൻസ്റ്റിറ്റ്യൂട്ട് ഓഫ് അലർജി ആന്റ് ഇൻഫെക്ഷ്യസ് ഡിസീസിലെ ഗവേഷകനായ ഡേവിഡ് മോറെൻസ് പറഞ്ഞു.
Post a Comment