തലശ്ശേരി: സമൂഹ മാധ്യമങ്ങള്‍ വഴി സ്ത്രീകള്‍ക്കെതിരെയുള്ള അധിക്ഷേപങ്ങളില്‍ കര്‍ശന നടപടി സ്വീകരിക്കുമെന്ന് വനിത കമീഷന്‍ അധ്യക്ഷ പിസതീദേവി. ഒരു യുട്യൂബ് ചാനലില്‍ സ്ത്രീകള്‍ക്കെതിരെയുള്ള അക്രമത്തിനെക്കുറിച്ച്‌ പറയുന്നത് കമീഷ‍ന്‍െറ ശ്രദ്ധയില്‍പെട്ടിട്ടുണ്ട്. ആ വിഡിയോ സമൂഹ മാധ്യമത്തില്‍നിന്ന് നീക്കാനും ഡി.ജി.പി വഴി അതേക്കുറിച്ച്‌ അന്വേഷണം നടത്താനുമുള്ള നടപടി സ്വീകരിക്കുമെന്നും പി. സതീദേവി പറഞ്ഞു. വനിത കമീഷന്‍ അധ്യക്ഷയായി ചുമതലയേറ്റ ശേഷമുള്ള ജില്ലയിലെ പ്രഥമ സിറ്റിങ്ങിനായി തലശ്ശേരിയിലെത്തിയതായിരുന്നു അവര്‍. 63 പരാതികളാണ് തലശ്ശേരി ടൗണ്‍ഹാളില്‍ നടന്ന സിറ്റിങ്ങിലെത്തിയത്.
36 എണ്ണം പരിഗണിച്ചതില്‍ അഞ്ചെണ്ണം തീര്‍പ്പാക്കി. 18 എണ്ണത്തില്‍ എതിര്‍കക്ഷികള്‍ ഹാജരായില്ല. ഇതുമായി ബന്ധപ്പെട്ട എതിര്‍കക്ഷികള്‍ക്ക് ഹാജരാവാന്‍ പൊലീസിന് നിര്‍ദേശം നല്‍കി. 58 എണ്ണം അടുത്ത സിറ്റിങ്ങിലേക്ക് മാറ്റിവെച്ചു.
തൊഴിലിടങ്ങളില്‍ പരാതിപരിഹാര സംവിധാനങ്ങള്‍ കാര്യക്ഷമമാക്കണമെന്ന് പി. സതീദേവി പറഞ്ഞു. അദാലത്തിനുശേഷം മാധ്യമങ്ങളോട് സംസാരിക്കുകയായിരുന്നു അവര്‍. തൊഴില്‍ സ്ഥാപനങ്ങളില്‍ സ്ത്രീകള്‍ അനുഭവിക്കേണ്ടി വരുന്ന ബുദ്ധിമുട്ടുകളുമായി ബന്ധപ്പെട്ട് കമീഷ‍െന്‍റ മുന്നിലെത്തുന്ന പരാതികളുടെ അടിസ്ഥാനത്തിലാണ് ഇത്തരം ഒരു നിര്‍ദേശം. അണ്‍ എയ്ഡഡ് സ്കൂളുകളില്‍ അധ്യാപികമാര്‍ക്ക് ശമ്ബളം കിട്ടാത്ത അവസ്ഥയുണ്ട്. സേവനവേതന വ്യവസ്ഥകള്‍ പാലിക്കാത്ത തരത്തിലാണ് പല സ്ഥാപനങ്ങളും പ്രവര്‍ത്തിക്കുന്നത്. ഇതിനെതിരെ നടപടിയുണ്ടാവണം. ഗാര്‍ഹിക, തൊഴിലിടങ്ങളില്‍ സ്ത്രീകള്‍ അനുഭവിക്കുന്ന പ്രശ്നങ്ങളെക്കുറിച്ച്‌ നിരവധി പരാതികള്‍ വനിത കമീഷന്‍ മുമ്ബാകെ എത്തുന്നുണ്ട്. ഇത്തരം പരാതികളില്‍ വേണ്ട നടപടി സ്വീകരിക്കാന്‍ ബന്ധപ്പെട്ടവര്‍ക്ക് നിര്‍ദേശം നല്‍കിയിട്ടുണ്ട്.
വനിത കമീഷന്‍ അംഗം ഇ.എം. രാധ, ലീഗല്‍ പാനല്‍ അംഗങ്ങളായ അഡ്വ.പത്മജ പത്മനാഭന്‍, അഡ്വ.കെ.എം. പ്രമീള, അഡ്വ.കെ.പി. ഷിമ്മി തുടങ്ങിയവര്‍ പങ്കെടുത്തു. അടുത്ത അദാലത്ത് പയ്യന്നൂരില്‍ നവംബര്‍ രണ്ടിന് നടക്കും.
إرسال تعليق